Alpha Oumar Konaré

Alpha Oumar Konaré

human

Ein sex anaa gender	male
Ein country of citizenship	Mali
Name in native language	Alpha Oumar Konaré
Name wey dem give am	Alpha
Ein date of birth	2 February 1946
Place dem born am	Kayes
Spouse	Adame Ba Konaré
Languages edey speak, rep anaa sign	French
Ein occupation	politician
Position ehold	Chairperson of the African Union Commission, President of Mali, Chairperson of ECOWAS
Educate for	University of Warsaw, Graduate Institute of Development Studies, Geneva Graduate Institute
Political party ein member	Alliance for Democracy in Mali
Candidacy in election	1997 Malian presidential election
Religion anaa worldview	Sunni Islam
Participant insyd	World Economic Forum Annual Meeting 2004

Alpha Oumar Konaré (dem born am 2 February 1946) be one Malian politician, professor, historian den archaeologist, wey serve as President of Mali for two five-year term from 1992 go 2002, den he be Chairperson of de African Union Commission from 2003 go 2008.

Scholarly career

Alpha Oumar Konaré, wey be de fourth son of one Fula woman wey be homemaker, dem born am for Kayes, Mali, wey he go primary school. He later attend Bamako ein Lycée Terrasson des Fougères, Collège de Maristes for Dakar, Senegal, Collège Moderne for Kayes, den between 1962 plus 1964, he go École Normale Secondaire for Katibougou. He finish ein advanced studies for history insyd École Normale Supérieure for Bamako (1965–1969), for University of Warsaw between 1971 plus 1975, den later for life, as mid-career student, he study for Graduate Institute of International and Development Studies for Geneva, Switzerland.

He start ein professional career as tutor for Kayes, den later become lycée teacher for Markala plus Bamako. For 1974, he do research for Institut des Sciences Humaines du Mali, den from 1975 go 1978, he serve as head for historic patrimony plus ethnography insyd Ministry of Youth, Sports, Arts, plus Culture. For 1980, dem appoint am as researcher for Institut Supérieur de Formation en Recherche Appliquée (I.S.F.R.A), den Professor for History/Geography department insyd Ecole Normale Supérieure of Bamako. Throughout ein career, he lead plenty professional organisations, like Association of Historians and Geographers of Mali, West African Association of Archaeologists, plus Union of West African Researchers. Between 1981 plus 1992, Konaré dey serve as consultant for United Nations Educational, Scientific and Cultural Organization (UNESCO) plus United Nations Development Programme (UNDP). From 1989 go 1992, he be president of ICOM (International Council of Museums; https://web.archive.org/web/20081221013404/http://icom.museum/founders.html#presidents).

Political activism

Konaré start dey inside politics since he be twenty years, as dem elect am as 1967 Secretary General for de Sudanese Union/African Democratic Rally (US-RDA, de party of President Modibo Keïta) for de École Normale Supérieure of Bamako.

After General Moussa Traoré ein coup d'état, he turn activist for de Marxist-Leninist underground Malian Party for Work (Parti malien du travail, or PMT).

But for 1978, he accept post for Moussa Traoré ein government as Minister of Youth, Sports, Arts, plus Culture. Even though he resign for 1980, ein time inside office bring about de formation of plenty Malian sports organisations. For 1983, he form plus lead de cultural review “Jamana” plus de cultural cooperative wey carry de same name. Again, for 1989, he start de daily newspaper Les échos, den for 1991, he launch Radio Bamakan, Mali ein first free radio station.

ADEMA den presidency

Insyd 1990, he join hand insyd de creation of de umbrella movement Alliance for Democracy insyd Mali (Alliance pour la démocratie au Mali, or ADEMA), wey bring PMT plus plenty other anti-Traoré groups together. As Moussa Traoré fall insyd 1991, Konaré help turn ADEMA into ADEMA/PASJ, wey be official political party, den he serve as demma delegate for de 1991 National Conference of Mali.

By de end of de democratic transition wey Amadou Toumani Touré bring, dem elect am as Mali ein first elected president for 1992, wey he get 69.01% for de second round vote against US-RDA ein candidate Tiéoulé Mamadou Konaté. Dem re-elect am again for ein second term inside de 1997 presidential election, even though some people boycott de vote to protest how he cancel de legislative elections. Dem swear am in on 8 June 1997.

Ein time for office be known for how he bring democracy back, even with de wahala wey happen for 1997. He manage de Tuareg Rebellion wey dey north, den he decentralize de government. But corruption still be big problem under Konaré ein administration.

Konaré talk publicly say he dey respect Mali ein first president, Modibo Keïta, den he build one memorial for am insyd Bamako. As he no dey support death penalty, he change de death sentence wey Moussa Traoré plus ein wife get to life imprisonment for 2002. People still remember am as de man wey bring de African Cup of Nations—de biggest football tournament for Africa—come Mali for 2002.

Insyd international level, Konaré work for peace den unity for de West African region. He serve as president for de Economic Community of West African States (ECOWAS) for 1999, den for de West African Monetary Union (UEMOA) for 2000.

As de constitution limit presidential terms to two, Konaré lef office for 2002, den Amadou Toumani Touré take over from am. Up till now, he be de only Malian president wey lef office after ein term finish. On 10 July 2003, dem elect am as Chairman for de Commission of de African Union (AU) during one summit for Maputo. He be de only candidate, as Amara Essy, wey dey act as interim chairperson, withdraw ein name before dem vote. 35 countries vote for Konaré, six vote against am, den four countries abstain.

Konaré vex civil society for Zimbabwe when he visit Harare on 14 October 2006 as Chairperson of de AU Commission but no gree meet civil society groups wey wan discuss Zimbabwe ein condition.

On 25 January 2007, Konaré talk say he no get plan to run for another term as AU Commission chairperson. On 1 February 2008, Jean Ping from Gabon win to succeed am; Ping officially take over from Konaré on 28 April 2008.

After de presidency

Insyd September 2021, Alpha Oumar Konaré, be urgently hospitalized insyd Morocco at Cheikh Zaid Hospital insyd Rabat.

External links

• "CURRICULUM VITAE of H.E. ALPHA OUMAR KONARE, Chairperson of the Commission of the African Union"