Khauhelo Deborah Raditapole

Khauhelo Deborah Raditapole

human

Ein sex anaa gender	female
Ein country of citizenship	Lesotho
Name in native language	Khauhelo Deborah Raditapole
Ein date of birth	7 August 1938
Place dem born am	Maseru
Languages edey speak, rep anaa sign	English, Sesotho
Ein occupation	politician, minister
Position ehold	Member of the Pan-African Parliament
Political party ein member	Basutoland Congress Party

Khauhelo Deborah Raditapole be one woman wey come from Lesotho wey be member for de Pan-African Parliament. Dem born Raditapole for Maseru on top 7 August 1938. She do ein early school for Lesotho, but she get ein Pharmacy degree from Lvov Medical School for Ukraine, den she finish ein higher studies for America. She work for teaching hospital for Tanzania for ten years because dem no gree make she enter Lesotho. She come back Lesotho for 1987 after de then Principal Secretary for Health, Tom Thabane, invite am.

She start ein political career as member for Mabote constituency for 1993 under Basotho Congress Party (BCP). Dem make she Minister of Health first, but later dem transfer am go Ministry of Natural Resources. When dem transfer am again for 1996, she resign from ein minister post — dis be de first time wey som person do dis kind thing for Lesotho. As minister, she set de plan for how dem go control AIDS for 1994 den she too get credit say she make Jordan basin project turn into Metolong Dam project.

Early life

Dem born Raditapole insyd Maseru on 7 August 1938, ein poppie be civil servant. She finish ein secondary school for Basutoland High School for 1959 for Lesotho. She do ein higher education for Soviet Union. She get scholarship wey make she fit do ein bachelor degree for pharmacy for Lvov Medical School from 1962 to 1967, den she do ein Master's for America. Dem no gree make she enter Lesotho because dem talk say dem train her to make bomb. She be refugee plus other people for Dar es Salaam, Tanzania. She work for one teaching hospital for Tanzania. Dem invite her back go Lesotho by de then Principal Secretary for Health, Thomas Thabane, wey later turn Prime Minister. As she return for 1981, she work for Lesotho Pharmaceutical Corporation.

Political career

Wen dem end emergency rule for 1992, Dr. Raditapole get vote enter Basotho Congress Party (BCP) National Executive Committee for de party ein first annual congress. She be de candidate for Mabote constituency under BCP for 1993 and she hold dat seat till 1998. Dem appoint am Minister of Health under Mokhehle ein government. For 1995, dem move her from Ministry of Health go Ministry of Natural Resources. She still dey serve for Natural Resources for 1996 wen dem reshuffle de ministers. She no dey happy so she resign from ein minister post — wey no be common thing for Lesotho. After she resign, people begin talk say she fit turn de next and first female Prime Minister for Lesotho, but ein party no win enough votes for de elections wey come after. Insyd 2003, she get one clash inside de party against de party leader Qhobela. Qhobela win de case for High Court, wey talk say de party conference wey she hold no proper. But still, she turn de party leader for de annual conference wey dem do on 28 February 2004.

Accolades

Raditapole, as Minister of Health, na she define de strategy for AIDS control for 1994, de epidemic wey nearly clear plenty citizens from de country. Dem still give am credit say na she push de Jordan Basin Project wey later turn Metolong Dam Project. Dis project help Basotho get clean water. For 2004, she serve as member of de Pan-African Parliament from Lesotho.