Kweku Budu-Acquah

Kweku Budu-Acquah

human

Ein sex anaa gender	male
Ein country of citizenship	Gold Coast Colony, Ghana
Name wey dem give am	Kweku
Family name	Acquah
Ein date of birth	3 June 1932
Languages edey speak, rep anaa sign	English
Ein occupation	civil servant, politician, minister

Kweku Budu-Acquah be Ghanaian politician den diplomat. He serve as Ghana ein first ambassador to Somalia den Ghana ein resident Minister for Guinea from 1962 to 1964. From 1964 till 1966, when dem overthrow de Nkrumah government, he serve as Ambassador Extra Ordinary den Minister Plenipotentiary.

Early life den education

Budu-Acquah born on 3 June 1932 for Akobima, one town near Saltpond. He start ein early education for Bekwai Methodist insyd Ashanti Region, den continue ein secondary education for Adisadel College, Cape Coast. Later, he go United Kingdom where he study Sociology, Political Science den Anthropology for Hull University. He study Development of Sociological Theory under Professor Ginsberg plus International Relations under Professor Manning for one year at de London School of Economics and Political Science.

Career den politics

Before he move go UK for further studies, Budu-Acquah work as editor for de Ashanti Sentinel, Accra Evening News, den African Spokesman. As member of de Convention People's Party (CPP), he serve as de party ein propaganda secretary too.

After Budu-Acquah return to de Gold Coast, he join de Kwame Nkrumah Ideological Institute as teaching staff. There, he teach Economics den Political Science, before he later enter de Ghana Foreign Service. For 1961, he get appoint as Ghana ein first ambassador to Somalia. During ein time there, he dey oversee other Eastern African colonies like Kenya, Uganda, den Tanzania until dem gain independence. But over time, de relationship between Ghana den Somalia start weaken, so for 1962, de Somalian government request say make Ghana recall ein ambassador. Budu-Acquah then get move go Guinea, where he become Ghana ein resident Minister, taking over from Stephen Allen Dzirasa, wey dem move go Ministry of Foreign Affairs as Deputy Minister. After he serve for two years inside Guinea, Budu-Acquah come back Ghana den continue work for de Ministry of Foreign Affairs as Ambassador Extra Ordinary and Minister Plenipotentiary. He later get succeed by D. K. Kulevome.