Munira Thabit

Munira Thabit

human

Ein sex anaa gender	female
Ein country of citizenship	Egypt, Ottoman Empire
Name in native language	منيرة ثابت
Birth name	Munira
Name wey dem give am	Munira
Family name	Thabit
Ein date of birth	1902
Place dem born am	Alexandria
Date wey edie	1967
Place wey edie	Cairo
Ein poppie	Thabit
Native language	Egyptian Arabic
Languages edey speak, rep anaa sign	Arabic, Egyptian Arabic
Ein occupation	lawyer, journalist, writer
Educate for	French Law School of Cairo
Start of work period	1924
Ethnic group	African people
Hair color	black hair
Eye color	brown

Munira Thabit (anaa Mounira Thabet) (Arabic: منيرة ثابت) (1902–1967) be Egyptian journalist den writer wey people know am as one of de first journalists wey demand say make men den women get equal rights. She be de first woman wey enroll for de French Law School for Cairo, wey she also be de first woman wey get license en droit (French law degree) make she fit practice law for de Egyptian Mixed Court. Even though she be de first woman lawyer for Egypt, plenty barriers stop am make she no fit practice law well, so she come focus on ein writing career instead.

Ein early Life

Dem born Munira Thabit for 1902, (some people talk say 1906) for Alexandria. Ein mommie get good education wey ein papa work for de Interior Ministry. We no know chaw things about ein private life sake of she no like talk personal stories for ein memoirs; she want make people focus on public den political issues. She go Italian school for Cairo where she learn small-small English den Italian, then later she go government primary school. After she get ein high school diploma for 1924, she write open letter give parliament dey complain say de 1923 constitution no allow women join elections or stand as candidates. For 1925, Thabit become de first woman to enter de French Law School for Cairo, wey later she get ein law degree for Paris for 1933, wey make am de first woman lawyer for Egypt. Dem allow am make she talk cases for de Egyptian Mixed Court pɛ, so becos of how things hard give women for law insyd, she turn go journalism.

Ein career

Between 1923 den 1933, Thabit struggle chaw make she fit join de Egyptian Feminist Union (EFU). Becos she commot from middle-class den working-class background, de "elite" women wey dey run de EFU no want gree make she or ein ideas enter demma organization. She believe say women deserve equality for everywhere—school, marriage, work, den even if dem want wear veil anaa dem no want. Thabit start de French magazine l’Espoir for 1925, wey one year later, she plus another journalist Abd al-Qadir Hamza start al-Amal, wey be de first Wafdist women's periodical. She den Hamza marry, but de marriage quench quick-quick, wey de two journals no print regular for de time she dey school. Later, she start dey write for Al-Ahram becos Antun Jumayyil invite am, wey she continue dat work reach when he die for 1948. When she dey study for France, she represent Egypt for one international journalism conference for 1928 for Cologne, Germany, becos dat time everyone see am as Egypt ein top woman journalist.

Munira Thabit

As Thabit finish ein law degree for 1933, de EFU finally invite am den other new graduates go party make dem honor dem. For de first time, dem allow am make she talk about de issues wey dey hia am for demma women's rights agenda. She write article about de Anglo-Egyptian treaty of 1936 wey she criticize de agreement. For 1938, she join de Eastern Women's Congress for Cairo dey push for Arab nationalism. For 1939, Huda Sha'arawi (EFU president) invite Thabit den Ceza Nabarawi make dem go de International Alliance of Women Conference for Copenhagen. People warn am say make she no talk any revolutionary or political matters, make she just support peace den accept de colonial order. But from dis conferences, Thabit get inspiration write ein 1939 "red book" wey she call The Cause of Palestine to challenge Western imperialism.

Thabit no be "pacifist" person; she self no really like how dem create United Nations. She want make Egyptian women remember demma history say for de past, before Western people come, women be rulers for de country. For 1946, she write series of articles dey criticize de Bevin-Sidqi negotiations about how British soldiers go leave Alexandria den Cairo. Dat same year, she publish ein memoirs wey she call A Revolution in the Ivory Tower. For de book insyd, she talk only about politics den public matters to show say women fit do serious analysis wey dem no be people wey just like talk "silly stories."

For ein later career, Thabit help chaw make dem fit found de Union of Egyptian Journalists. For de 1950s, she push de Ministry of Education make dem stop de rule wey talk say if woman marry, she must stop teaching work. She volunteer for civil defense for de time of de Suez Crisis for 1956, wey de following year, she try contest for Parliament but she no win. For 1960, she finally close al-Amal becos President Nasser talk say all press organizations must turn government property. Dat time, Thabit start dey lose ein eye-sight, so she travel go outside for 1964 go do operation wey e help am see again. She die for Cairo for September 1967.

Ein selected works

• Qadiyat Filistin: ra'i al-mar'a al-Misriya fi-l-kitab al-abyad al-injlizi (قضية فلسطين : رأي المرأة المصرية في الكتاب الأبيض الإنجليزي) [The Cause of Palestine: Egyptian Woman’s Opinion on Britain’s White Paper] (in Arabic). Cairo, Egypt: رابطة التضامن الأدبي. 1939. OCLC 4770419694.
• Thawra fi-l-birj al 'aji: mudhakkirati fi 'ishrin 'aman 'an ma'rakat huquq al-mar'a al-siyasiya (ثورة في البرج العاجي : مذكراتي في عشرين عاما عن حقوق المرأة السياسية) [A Revolution in the Ivory Tower: My Memories of Twenty Years of Struggle for Women's Political Rights, memoir] (in Arabic). Cairo, Egypt: دار المعارف. 1946. OCLC 4770048838.