Stanley Mogoba

Stanley Mogoba

human

Ein sex anaa gender	male
Ein country of citizenship	South Africa
Name wey dem give am	Stanley
Ein date of birth	1933
Languages edey speak, rep anaa sign	English
Ein occupation	politician, anti-apartheid activist
Educate for	University of South Africa

Mmutlanyane Stanley Mogoba (born 29 March 1933) be retired South African politician plus Methodist minister. He be de president of de Pan Africanist Congress (PAC) from 1996 go 2003 den he represent de party for de National Assembly from 1997 go 2004. He be former anti-apartheid activist den former prisoner insyd Robben Island. He serve as presiding bishop of de Methodist Church of Southern Africa from 1988 reach 1996.

Early life den activism

Dem born Mogoba on 29 March 1933 for Polokwane insyd de former Northern Transvaal. He be de last born among six siblings, born to ein poppie wey be teacher plus Methodist lay preacher. Because of de influence of Flag Boshielo from de Communist Party of South Africa, he join de African National Congress (ANC) Youth League while he still dey high school. He finish ein bachelor's degree for University of South Africa for 1954 den qualify as teacher. He dey active insyd de Transvaal United African Teachers Association den he take ein role as high school teacher help push political education give ein students.

Insyd 1959, Mogoba go one public meeting wey Robert Sobukwe talk. Sobukwe impress am. After Sobukwe comot from de ANC go start de PAC, Mogoba come get strong link plus de new group, even after de apartheid government ban am for 1960. Insyd early 1963, police arrest Mogoba for ein house for Mamelodi den dem convict am say he dey push de work of de banned PAC. Because of dat, he spend three years for prison, mainly for Robben Island. While he dey serve ein sentence, he feel say God dey call am, so he start to study theology.

Wen dem release Mogoba insyd 1966, dem give am banning order wey make dem banish am go Phokwane den dem no allow am work as teacher again. So he come work as administrative clerk. Insyd January 1969, he start ein work as minister on probation inside de Methodist Church, den de next year he begin three-year course for John Wesley College ein campus for Alice. After he complete de course, dem ordain am as minister. For 1988, dem elect am as de presiding bishop of de Methodist Church of Southern Africa. He serve eight years for de position, wey be record, as dem elect am again two times.

Post-apartheid political career

Election as PAC president: 1996

Insyd de PAC ein fifth annual conference for Thohoyandou insyd December 1996, Mogoba get elect as president of de party without any challenger. Ein main opponent for de position be de sitting president, Clarence Makwetu, but dem persuade am make he withdraw from de contest den take anoda role as PAC chairperson. Mogoba resign from de church earlier dat same month so dat he go fit take up de presidency. He talk say he no dey worry about uniting de PAC, because de members for ein church too get political diversity.

As PAC president, Mogoba oversee de official disbanding of de Azanian People's Liberation Army (APLA), wey be de armed wing of de PAC during apartheid. He lead de party through demma campaign before de 1999 general election, den during dat time he cause controversy when he talk say criminals for get punish through amputation. After dem elect am, he get nominate to take one PAC seat for de National Assembly.

Sell-out rumours: 1997

Insyd September 1997, while Mogoba dey serve for Parliament, questions begin come up about ein integrity after some media reports talk say President Nelson Mandela advise am make he no try get position for de Portfolio Committee on Intelligence, so dat he no go face de “shame” of security clearance check. De PAC see de reports as plan to make people see Mogoba as security risk den sell-out. Some sources tell de media say Mogoba no fit get security clearance because for 1988 trial of Enoch Zulu, former APLA commander wey apartheid state convict for terrorism, he act as state witness. Mogoba agree say he testify for de trial, but he talk say he do am based on PAC ein advice after dem subpoena am. He talk say ein testimony no add anything to incriminate Zulu, except say he admit say he give Zulu shelter for ein house for Durban. Insyd PAC press conference insyd October, Mogoba ein story get support from PAC elder Johnson Mlambo – wey talk say na Zulu actually implicate Mogoba when he tell police say Mogoba help am – plus Zulu einself confirm am.

But later dat same week, Zulu change ein story and tell media say Mogoba betray am. De lawyer wey defend Zulu during de trial, Dikgang Moseneke, call ein new claim “nonsense” den say Mogoba na “de real hero” because he hide APLA commanders for ein house. Still, de PAC vex well-well, talk say Zulu dey try destroy Mogoba ein name because he support former PAC president Clarence Makwetu, wey Mogoba take over from. Plus, PAC MP Patricia de Lille talk for one parliamentary debate say de ANC know say some of dem own members be spies for apartheid time. She talk say ANC get list of such spies, den she mention some wey dey serve as politicians, including cabinet ministers Joe Modise, Stella Sigcau, den Penuell Maduna.

Second parliamentary term: 1999–2003

PAC ein performance for de 1999 election be very poor, den Mogoba offer make he resign from ein party position. But still, dem nominate am to one of de three seats wey remain for de party inside de National Assembly. He serve there together plus Patricia de Lille den ein deputy, Motsoko Pheko. While he dey Parliament, he criticize President Thabo Mbeki ein HIV/AIDS policy, den he support higher taxes to help clear poverty.

Even though PAC no accept ein resignation offer for 1999, over de next few years, he face constant pressure from inside de party for new leadership. De pressure reach breaking point before de party ein 2003 elective congress. Even though Mogoba first talk say he go contest again, for June 2003 he announce say he go step down. Ein former deputy, Motsoko Pheko, take over as PAC president. For February 2004, Mogoba resign from de National Assembly too, make room give Pheko ein new deputy, Themba Godi. For later years, as PAC divide into factions, Mogoba support de side wey stand by Pheko, against de one wey Letlapa Mphahlele, Pheko ein successor, lead.

Ein life matter

Mogoba ein first wife die insyd de late 1960s. Insyd 1969, he remarry to Johanna Mamongae Mahlare, plus whom he has three kiddies.